Jäggi in Sweden

Zum Schluss e Bricht vo minere Abschlussreis. De Martin, mi Korridor Nochber, hed gmeint, dassmer unbedingt selid zu ihm uf Lysekil (ade Westküschte, chli nördlich vo Göteborg) go midsummer fiire. Midsummer isch das weekend wos am längschte hell isch vom ganze Jahr und das wird in ganz Schwede traditionell gfiired. Ich ha sowieso sehr gärn welle für midsummer do bliebe, wil das öpis vom bekannteschte und gröschte Volksfäscht do in Schwede isch und so hed sich das optimal ergä. Wil sSemester verbi isch und scho sehr viel Lüüt heigange sind, hemer de das Ganze grad mitmene Abschlustrip verbunde. Ich bi also mitmene Kolleg (Nicolas, French) zerscht es paar Täg uf Stockholm gange. Stockholm isch vor allem jetz im Sommer ganz bsunders schön und wird ned umeschuscht Venedig vom Norde gnennt. Mer hend de ded auno zwoi Kollege vo Växjö troffe und hend sightseeing gmacht, sogar Museum go aluege und hend au chli gshopped. Am Obe simer de mitere Kollegin wo au in Växjö studiert hed und etz in Stockholm schaffed i Usgang und hend de au chönne bi ihre übernachte.

Am Fritig ischs de quer durchs Land vo Stockholm noch Göteborg und Lysekil gange. Ded simer härzlich empfange worde und sind grad zur Familie Midsummerfiir iglade worde, wos de typischs menu mit Hering und viele andere Sache v.a. Meeresfrücht gä hed. Zwüschedinne hed die ganz Familie immer wieder mit shots vo Vodka agstosse:-) Das isch sehr luschtig gsi und e gueti Istimmig uf Midsummer Nacht Party. Ded simer bi Fründe vom Martin gsi und hend en super Party gha mit nomol ässe, trinke, ume Midsummer Baum tanze usw.

Mer hend de au ded gschlofe und sind de au sganze wuchenend immer mite gliche Lüüt zäme gsi. Am nöchschte Tag mit zMorge ässe, a Strand go relaxe, is Meer go bade und de am Obe Barbecue und ane riese Party gange. Am Sunntig Obe isch de de Spass verbi gsi und nochde Verabschiedig simer wieder mitem Zug uf Växjö zruggfahre. Alles i allem isch dä Abschlusstrip es super Erläbnis gsi, womer viel Spass gha hend und au noeinisch chli meh i die schwedisch Kultur ine gse hend. Bilder gibt es hier!

Rückblick auf die letzten Wochen und... schon bald zu Hause!

Die letschte paar Wuche sind ganz underem Zeiche Masterarbet fertig schriebe, no so guet wie möglich gniesse und Abschlussparties gstande. Zerscht mol zum eigentlich wichtigste, Parties sind guet gsi:-) Nänei, es god natürlich um dMasterarbet. Die hemer letscht Wuche abgä und das isch en riese Erliechterig gsi. Mer hend etz so lang do dra gschaffed und endlich isches zumene Endi cho. Nochde Abschlusspräsentation und Seminars hemer scho mol es positivs Feedback vo üsem Mentor übercho, d.h. dasmer eigentlich fascht sicher bestande hend unds etz nurno drum god wie guet bestande. Das isch natürlich en super Nochricht gsi und de Ufwand mit viele Interviews usw. hed sich glohnt.

Näbebi hemer glich auno Ziit gfunde um de Sommerafang zgniesse. Es sind Fuessballturnier, gemütliches grilliere und zämesii, wie au verschiedeni Parties ufem Programm gstande. Zum Schluss sind de halt au einigi Abschiedsparties cho, wo de meischtens chli trurig gändet hend, aber irgendwenn muss halt au das zumene Endi cho. Ich hami etz scho länger chli uf dRückkehr igstellt und hoffe, dass ich mich wieder beschtens zrächtgfinde im „alte“ Läbe. Aber es gid natürlich au e hufe uf was ich mich freue. Natürlich ghöred do alli Lüüt dezue won ich bald wieder gse!

Zerscht gods etz aber no ufne chlini Abschlussreis noch Stockholm und de am nöchschte Wuchenend zumene schwedische Kolleg, wo ide nöchi vo Göteborg wohnt, go Midsummer fiire. Das isch es grosses Fäscht wo in ganz Schwede gfiired wird. A däm Wuchenend isch de längschti Tag vom Jahr, es wird gar nüme richtig dunkel...

Zum Schluss etz do no es paar Föteli Bilder gibt es hier!

Bis bald, Zischtig 26. Juni 1930 grosse Empfang am Flughafe Züri:-) haha

Besuch von Mam und Corine

Jetz aber doch es paar Föteli und es churzes Brichtli vom Bsuech vom Mam und vode Corine. Sie sind mich Afangs Mai für vier Täg uf Växjö go bsuche, was mich natürlich sehr gfreut hed. Ich ha ihne natürlich au chli einiges welle zeige und so hemer es dichts Programm gha. Zum Glück isch au immer schöns Wätter gsi, so hemers au richtig chönne gniesse. Nochde Akunft vo ihne in Schwede bin ich sie am Bahnhof zVäxjö go abhole und hasi grad i mis Zimmer iquartiert, günstigi und gueti Übernachtig für 2 Täg, inkl. Früehstück!

Mer hend zwoi Täg in Schwede und zwoi Täg in Kopenhagen iplaned gha. So hemer in Växjö sälber gar ned so viel Ziit gha, was aber ned allzu viel usgmacht hed, wils do eigentlich gar ned so wahnsinnig viel zgse gid. Mer hend üs dehalt ufs wesentliche konzentriert und ich ha ihne am erschte Tag zerscht mol de Campus zeiged und ufem Wäg idStadt hemer de chli chönne tratsche und Neuigkeite ustusche.

Am nöchschte Tag simer mitem Auto i obligati Elchpark und am Nomittag adOstküste noch Kalmar gfahre. Kalmar isch es schöns Städtli direkt am Meer. Vor de Stadt isch en grossi Insle wo mitere 12km lange Brugg mitem Festland verbunde isch. Do simer de au drüber gfahre und obwohls ufde Insle ned allzu viel zgse gä hed, isch das ganz idrücklich gsi. Am Obe simer de wieder fein uswärts go ässe und früe is Bett, wils am nöchschte Tag noch Kopenhagen gange isch. Kopenhagen isch würkli en super schöni Stadt, wo de dFraue am letschte Tag auno viel hend chöne go shoppe währendesse ich wieder zrug uf Schwede gange bi.

Insgesamt hemer natürlich e gueti und schöni Ziit zäme gha und ich glaube oder hoffe, dass es am Mam und ade Corine au gfalle hed:-) Bilder gibt es hier!

Finland-Russia Trip

Wil ich noch Russland ned krank worde bi wie nochem Lappland, hani au ned so viel Ziit woni ned weiss was mache und darum wird dä Bricht au ned so usfüehrlich mitere Beschriebig vo jedem Tag wie de Text vo Kiruna:-) Mer hend nämlich momentan au mega schöns Wätter bi üs in Schwede und das mussi doch au chli gniesse. Etz aber glich es paar Wort zu üsem 10 tägige Finnland und Russland Trip.

Mer sind zerscht mitem Zug vo Växjö noch Stockholm gfahre, wo sich alli Lüüt bim Hafe troffe hend. Insgesamt sind doch viel meh Studente mitcho, als i eigentlich erwartet ha. Mer sind ca. 30 Lüüt vo Växjö plus ca. 100 vo andere Unis vo ganz Schwede gsi. Do hemer natürlich viel neui Lüüt könneglert und so isch au immer öpis los gsi. Das hed scho agfange ufde Fähri vo Stockholm noch Turku, womer es ähnlich riesigs Schiff gha hend wie woni uf Tallin/Estland bi (Bricht wiiter unde).

In Turku simer de noch Unis ufteilt und uf 3 Büs verteilt worde. De simer uf Helsinki gfahre, womer au ei Tag und e Nacht blube sind. Ded hemer zerscht Sightseeing Tour gha und am Nomittag freie Ziit für üs. De Michi hed ded 3 Mädels könnt, wo letscht Johr imene Ustuschsemester uf sinere Uni in Graz gsi sind. Sie hend sich de troffe und ich bi mit ihne mitgange und die drü girls hend üs de au alles sehenswärti vode dStadt zeigt. Am Obe simer de auno in Helsinki i Usgang. Helsinki isch chli chliner als Stockholm, aber sehr schön und sehenswärt.

Nochde Gränze, wo alli hend müsse usstiege, Visa zeige, de Bus kontrolliert worde isch und alles ca. ei Stund dured hed, hedmer scho mol de erschti Idruck vo Russland übercho. Ade Strosseränder sind die ganz Strecki entlang Abfallbärge gsi, alti Pneu umegläge, au streunendi Hünd sind irgendwo umegloffe und dStrosse sind imene Zuestand gsi schlimmer als uf jedere Bärgstross bi üs dehei. Nochere halb Stund hemer de irgendwo im Niemandsland en Stop gmacht ufmene Parkplatz und de Buschauffeur hed gmeint do sig de „Russian Forest Market“, d.h. es sind eifach zwoi Autos änegfahre und hend de ganz Kofferum voller Vodka und Zigarette gha, alles mega billig natürlich. Chli spöter isch de au e Russ mitere riese Biegi Rubles cho und mer hend chöne grad bi däm Gäld wächsle zumene gar ned schlächte Kurs. Das isch natürlich alles schwarz, aber so lauft das halt mol ded. De Buschauffeur hed de au 20Euro igsteckt übercho, eifach wiler halt die Stops gmacht hed. Die Reiseleiter hend eifach scho ihri Beziehige ded und wüssed wie dases lauft in Russland. Das isch scho mega hilfriech gsi, eleige wärmer glaub mängisch schochli ufgschmisse.

Schlussendlich acho in St. Petersburg simer ines sehr schöns Hotel, wie au in Helsinki und Moskau, mit zMorgebuffet und allem, iquartiert worde. Zerscht hemer au wiederum en Sightseeing Tour gha und hend nochhär dStadt sälber uskundschaftet. St.Petersburg hed 5Mio Iwohner und vieli Sehenswürdigkeite zbiete, au die tiefscht U-Bahn (über 100m tief) vo de Wält isch ded.

Noch 2.5 Täg in St. Petersburg ischs de über Nacht wiiter gange noch Moskau, ca. 13h Fahrtziit, aber wie gseid isch das gar ned so schlimm gsi. Nochmene chline Zwüschefall wo üse Bus en Sicherheitslinie überfahre hed und Polizei gfunde hed sie weli etz de ganz Car dursueche, die Sach de aber mit 500Rubles (15Euro) gregled gsi isch simer bide Akunft am Morge überwältiged worde wo däre riesige Stadt. 1.5mol so viel Iwohner wie die ganz Schwiiz (über 10Mio), 10spurigi Strosse ide Stadt und so viel Sache zgse, unglaublich. Mer hend de au grad bim rote Platz gstoped und sind de berüehmti red square go aluege. Ded isch au de Kreml, sMausoleum vom Lenin, es riese Ikaufscenter und wie überall wunderschön verziehrti Gebäude. Noch däm erschte Idruck hemer wieder en Sightseeing Tour gha und sind de au wieder eleige dur dStadt zoge.

Es isch uffällig gsi, dass vieles sehr prunkvoll isch in Russland, vieli riesigi Gebäude, in Moskau sind sogar dU-Bahn Statione verziehrt, vieles us Marmor und Statue überall. Es sind so die Gägesätz, es gid ned en grossi Mittelschicht, vieli armi Lüüt oder ganz riechi. Ufde Strosse gsedmer uralti Trabis und de näbedra so riese Schlitte vo Autos wos nedemol bi üs zgse gid. Ide Städt sind aber glaub scho eher chli die richere Lüüt so vom Idruck här. Mer merkt au, dass Russland würkli no sehr viel ufzhole hed gägenüber westliche Länder, v.a. was Touriste agod. The westlich Ifluss isch aber natürlich scho zgspüre, es gid z.B. es paar wenigi McDonalds oder au hie und da moderni Gebäude vo grosse Unternehmige. Die allermeiste Russe redet aber keis Wort englisch und wemer als e Tourist öper öpis frogt, schüttleds de Chopf und laufed wiiter ohni es Wort zsäge. Natürlich sind ned alli eso, im Usgang hemer au es paar jungi Lüüt atroffe, wo chli englisch hend chöne und au ufgschlosse und fründlich gsi sind.

Vom Wätter här hemer au ziemli Glück gha, obwohls scho einiges chälter gsi isch als do in Schwede. Es hed sogar zwoi oder drümol kurz gschneit, aber schuscht hemer eigentlich immer guets Wätter gha. dRückreis isch de ohni wiiteri Zwüschefäll verlaufe und mer sind wieder über die holprige Strosse vo Moskau zrug noch St. Petersburg, womer no einisch übernachtet hend und no en russische Volkstanz sind go luege. Schlussendlich ischs wieder zrug uf Helsinki und mite Fähri noch Stockholm gange. Bilder gibt es hier!

Der Campus erwacht

Wie gseid ischs etz au bi üs in Schwede richtigs T-Shirt Wätter, sunnig und warm. Das macht eso viel us, all Lüüt chömed us ihrne Löcher kroche, mer gönd a See, hend Barbecues, alli sind usem Winterschlof verwached und de Campus chund wieder so richtig Läbe über. So godsmer etz dementsprächend au sehr guet und ich cha mini Usziit umso meh gniesse.

Am nöchschte Mändig stod au wieder einisch en nöchschte grössere Trip a. Das mol gods uf Russland!! Das isch wiederum en Trip wo vode Uni us organisiert wird, wilmer schwär eleige uf Russland chund. Sisch ziemli korrupt und au kompliziert es Visum zübercho usw. dUni organisiert das etz alles für üs und mer sind wieder einigi Lüüt wo vo Växjö de Trip über Ostere in Angriff nämed. Insgesamt sinds 60 Lüüt vo verschiedene Unis vo ganz Schwede. Mer gönd zerscht vo Stockholm mite Fähri uf Helsinki, de simer ei Tag und e Nacht ded und nochhär gods mitem Bus wiiter uf St. Petersburg und Moskau. Ziemli langi Busfahrt, z.T. au über dNacht, aber ich freumi natürlich mega, das wird sicher super!

Und zum Schluss noch dies: Ein Bodaner, ein Kyburger und ein Waldstätter betreten ein Lokal. Der Bodaner bestellt ein Schützengarten und der Kyburger ein Hürlimann. Der Waldstätter bestellt einen Ice Tea. Fragen die anderen spöttisch: trinkt man bei euch Waldis in Luzern Ice Tea am Stamm? Sagt der Waldstätter: Ach, ich dachte, wenn ihr kein Bier bestellt, bestell ich auch keines:-)

De Früehlig chund!

Ich ha mini Homepage chli vernochlässiged ide letschte Ziit. Ich muss aber säge, es gid gar nüm so viel z’brichte, woni ned au scho mol gseid ha wiiter unde und en grössere Usflug hed sich sit Kiruna eigentlich au nüme ergä. sLäbe verändert sich wemer do ufem Campus isch natürlich au ned immer ständig. Es sind zwar einigi neui Lüüt cho uf das zwoite Semester hi und das bringt natürlich scho es paar Veränderige und Abwächslig. Allgemein sind leider nüm so viel Usduschstudänte do wie im letschte Semester und dur das ischmer au nüm ganz so viel uf Trab, was natürlich ned heisst, dass gar nüdme los isch:-) Viel hani natürlich au scho gse, zrächtgfunde und igläbt hami jo au scho lang und so machi au nüm immer alles mit, woni letscht Semester no immer und überall debie gsi bi. Mer isch trotzdem natürlich immerno viel um Lüüt ume, isch trotzdem no viel underwägs, ufem Korridor, macht immer öpe schuscht öpis mit Lüüt ufem Campus (Sauna, Sport, esse usw.), god ad Uni und natürlich immerno öpe i Usgang. Ab und zue gids au so Korridorparties, wo chli Abwächslig i dStudäntepubs bringed. So heds chürzlich en Karnevalparty gä oder natürlich hed au immer irgendwo öper Geburtstag oder es gid amene Ort en corridor crawl (hani jo au scho mol drüber brichtet).

Komischerwies verleided eim au die zwoi Studäntepubs ufem Campus ned so schnell:-) Ded trifftmer halt immer Lüüt, könnt sich, ret, alli sind guet truffe, god chli go tanze usw. Dur das simer eigentlich au gar ned so ide Stadt im Usgang, wos natürlich au Discos gid. Die sind aber halt au tüürer, nur scho Itrit und es Bier (Alkohl isch eifach übertriebe tüür do, usser ebe ide Studentepubs) choschtet grad emol guet 25.-. dStudäntepubs sind au grad ufem Campus und das isch v.a. underde Woche halt schono gäbig.

So fühlmi also immerno rundum wohl do in Växjö und ich gniesse die Ziit woni do ha immerno sehr. Ich ha gueti Lüüt um mich ume, fühlmi wohl i mim Zimmer, woni übrigens mitere grosse Schwiizerfahne (mer wird eifach zum Patriot im Usland und das v.a. als einzige Schwiizer ade ganze Uni!) und viele Fotene vo dehei, Kollege, Familie und Erläbnis vo do gschmückt ha. Au dUni und eifach allgemein sLäbe mit so viele verschiedene Lüüt, wo au immer öpis los isch, isch natürlich nach wie vor ufregend.

Mier chund etz au die temporäri Rueh eigentlich grad gläge, wili momentan doch rächt viel zdue ha ade Uni (Vorarbete für dMasterarbet) und de hani grad kürzlich auno e Prüfig vo Bern do gschriebe, wo hoffentlich guet usecho isch! Wil ich jo ursprünglich nur eis Semester planed ha zbliebe, hätt ich die Prüfig etz in Bern gschriebe. Zum Glück heds aber klapped, dass ich die Prüfig etz ade Uni Växjö zur gliche Ziit ha chönne schriebe wie in Bern. So bini etz grad es Ziitli dopplet usglaschtet gsi, schat jo aumol nüd chli meh für dUni zmache:-)

Marco in der Tagesschau:-)

Ich ha gester und hüt es paar Afroge übercho, ob ich eigentlich immerno in Schwede bi oder scho wieder heimlich dehei?!? Ich hami natürlich total gwundered, aber wieni mi de au sälber überzügt ha bide Internetvideos vom Schwiizer Färnseh, bini gester tatsächlich churz im Swisscom Shop zBern imene Bricht über dSwisscom ide Tagesschau ufdaucht. Aber nei, ich bi immerno in Schwede!! Sowiet mol alli Zwiefel usgruhmed:-) sSchwiizer Färnseh muss eifach zfuul si neue Sache zdreihe und hed eifach nomol das gliche Bild (mer muss halt scho säge, sisch halt scho e sehr gueti Sequänz:-)...) wie voreme Johr gno. Ded bini tatsächlich mol im Swisscom Shop zBern gsi und hami de am Obe au ide Tagesschau gse, aber ebe etz nomol genau sgliche wie damals voremen Johr:-) Das mol zu däm...

Schuscht godsmer immerno sehr guet do in Växjö. Es sind einigi neui Lüüt cho ufs zwoite Semester, aber doch au viel vom letschte Semester blube. Insgesamt sind nüme ganz so viel Ustuschstudente do wie im letschte Semester, aber das sind natürlich immerno meh als gnueg. Mittlerwiele könni natürlich au scho es paar Schwede, wo au immer öpe underwegs sind und so könntmer ingesamt so viel verschiedeni Lüüt ufem Campus. Do ich halt doch au scho einiges könne und nüme überall muss debi si um alles zentdecke, chani mier vieles guet iteile und do debie si woni weiss, dasses cool isch und mier Spass macht. dUni wird mite Masterarbet das Semester sowieso ned weniger ufwändig und de passt das eigentlich alles grad ganz guet.

Ich hoffe im schöne Switzerland isch au alles klar und üch allne gods guet. Ich freumi natürlich au immer über Neuigkeite und Bricht, aber de Kontakt isch jo doch rächt guet. Wiiterhin allne e gueti Ziit und gniesseds!

Usfüehrliche Reisebericht Lappland

Mer sind zfüfte vo Växjö mitem Zug Richtig Stockholm gfahre, womer de am Flughafe de Nägi, Phil, Roger und de Schmidi troffe hend. Sie sind scho früe am Morge in Stockholm acho und hend dure Tag Stockholm besichtiged. De Flüger uf Kiruna isch de pünklich am halbi 8i am Obe abgfloge und mer sind nochmene Zwüschehalt in Are (ded wo etz grad Ski-WM isch) ca. am halbi 10ni ide nördlichste Stadt vo Schwede acho. Distanz vo Växjö uf Kiruna isch länger als vo Växjö idSchwiiz, de chamer sich mol vorstelle wie nördlich die Stadt im Lappland lied.

Am Flughafe, wo total igschneied gsi isch und üses Flugzüg s'einzige ufem ganze Flughafe gsi isch, simer de vo üsem Füehrer abgholt worde und i üses Camp gfahre worde, wo chli abgläge im Wald und grad amene zuegfrorene See gläge isch. Mer hend i 2 Hüttli gwohnt, wo zwar chli eng gsi sind, mer aber alles gha hend womer brucht hend zum läbe.

Am erschte Tag hemer natürlich alles chli welle go uskundschafte und uschecke was i däm hohe Norde so alles los isch. Zum Glück isch scho Mitti, Endi Januar gsi, so hemer doch scho ca. ei Stund dSunne gse dure Tag und hell mit Dämmerig ischs ca. 5h gsi. Wil normal im Winter dSunne gar ned füre chund und im Sommer defür dSunne 24h schient, wird’s ab Mitti Dezember jedi Wuche überne Stund länger hell. So hemer üs also am Morge guet ipackt und serschte mol sone richtige Winter erläbt i däm Johr. shed so viel Schnee gha, alles isch total igschneit gsi und Temperature sind immer zwüsche minus 25 bis minus 33Grad gsi. Es isch sone trochni Chälti gsi, also ned ganz so schlimm, aber halt glich öpis wo mier üs überhaupt ned gwöhnt sind.

Am Nomittag simer de uf Kiruna sälber gange, die Stadt isch relativ chli, aber glich mega härzig. Für am Obe hemer de auno sJakuzzi und dSauna igheizt, alles mit Holz, um üs wieder chli ufzwärme. Vorhär simer aber no ufne Nordliecht Tour mite Schneetöff. Mer sind ufde gröschti Hügel ufe i däre Gägend und i däre Dunkelheit, Chälti und klare Nacht hedmer gmeint mer chöni dStärne fascht alänge. Leider hemer chli Päch gha mite Nordliechter, die chömed halt ganz underschiedlich und mer hend sie de nur einisch usem Flugzüg us gse. Trotzdem hed sich die Tour natürlich glohnt, nur scho mite Schneescooter zfahre hed natürlich Spass gmacht.

Nochdäm alli guet gschlofe hend, wilmer jo scho so viel erläbt hend und natürlich au die Chälti müed macht, hemer üs scho am Morge am 9ni wieder i dicki Chleider igmummt, um s'wältberüehmte Ishotel go azluege. Ohni die zuesätzliche Chleider womer ded im Camp übercho hend, wäred die Trips ned möglich gsi, wil mier eifach gar ned so gueti Chleider hend, um bi minus 30Grad e ganze Tag verusse zsi und no Schneetöff zfahre. Noch ca. einere Stund Scooter fahre, die hend übrigens rächt Power gha (Höchstgschwindigkeit womer gfahre sind 80km/h, wo aber no meh gange wär, de Töff de aber scho rächt instabil worde isch...), simer de bim Icehotel acho und das isch öpis sehr Idrücklichs gsi. sGanze Hotel isch total us Ice gmacht und so wird das au jedes Johr wieder neu ufbaued und isch dementsprechend keis Johr glich wies andere. s’Ice wird vomene Fluss im Februar, März „gärdnet“ und bis im nöchschte November ufbewahrt. De wird das Hotel mit däne Icechlötz, wo jede 1.5Tonne schwär isch und mit Schnee wos bis im November natürlich scho jede Menge hed, wieder neu ufbaued.

Insgesamt wärded ca. 900 Tonne Ice verwänded für das ganze Hotel. Das Is isch au so klar, dassmer dur dure gsed und au jedes Zimmer isch individuell vomene Künstler gstaltet. So geds die verschiedenste Skulpture und Iceforme i jedem Zimmer. Zum Schlofe sells au gar ned so chalt si, sBett bestohd zwar au usmene Icechlotz, aber drufobe isch e Matraze und Rentierfälli. Im Hotel inne ischs au „nur“ minus 5Grad, im Verglich zu -30Grad dusse grad agnähm. Natürlich gids au es „normals“ Restaurant und en Ufenthaltsruum wo normal gheizt isch und wo Gäst sich chönd umzieh und dusche. Es gid au e Kappelle ded und mängisch bis zu 4 Hochziite pro Tag, dLuxus-Suite kostet für 2 Persone ca. CHF 1000.- pro Nacht. Nochdäm mer nochere Füehrig all die interessante Informatione übercho hend, simer no ad Icebar. Natürlich isch au ded alles us Ice gsi, inkl. Gläser (heisse Kaffee heds de natürlich scho im Pappbächer gä, übertriebe müemers jo ned:-)...)

Am dritte Tag isch Dogsledge ufem Programm gstande, d.h. Hundeschlitte fahre. Das isch natürlich au mega interessant gsi, nur scho wie die Hundehalter mit däne viele Hünd cho sind, die igspannt hend und mit däne Hünd umgange sind. Mer hend insgesamt 3 Schlitte gha und vor jedem sind ca. 10 Hünd gsi, alles so Huskys, richtigi Hundeschlittehünd halt:-) Die Hünd sind am Afang so ufgregt gsi und hend unbedingt welle los seckle. Im Verglich zude Schneetöff ischs natürlich chli gmüetlicher vorwärts gange, defür umso romantischer und mer hend endlich mol chönne die Landschaft so richtig gniesse. Mer sind dur Wälder und über zuegfroreni See gfahre, eifach traumhaft. Bimene Rast heds de wieder am offene Füür Kaffee und Tee gä und dHünd sind scho chli ruhiger gsi. Mer hend sie de au guet chönne streichle und dHünd sind ganz zuetraulich und härzig gsi. Vode Halter hemer de au erfahre, was sie so möched und wie das Läbe so isch mit so vielne Hünd, was natürlich sehr interessant gsi isch.

Am spötere Nomittag hemer üses Glück no bim Icefische probiert, wo eigentlich sLoch im See die gröscht Herusforderig gsi isch. Am Obe heds de ohni Fisch im Mage wieder Sauna gä und am 12i hemer no ufe Phil si Geburtstag agstosse. Es isch de halt au chli spöter worde und wilmer am Morge sehr früh wieder hend müsse go, heds de halt ned würklich viel Schlof gä ide letschte Nacht.

Alles i allem chamer sicher säge, dassmer sehr viel erläbt hend i däne paar Täg und dases es einmaligs Erläbnis gsi isch. Am Phil wünschi natürlich nomol alles Gueti zum Geburtstag und das vier Kollege vo deheime mitcho sind, hed mich natürlich ganz bsunders gfreut! Danke üch allne nomol, es isch würklich en super Ziit gsi womer zäme gha hend und mer wärded sicher no oft a das Erläbnis Lappland zrugdänke... Bilder gibt es hier!

Geburtstagsfotos und wieder gut zurück gekommen vom Lappland

Das isch en churze Zwüschebricht bevor ines paar Täg en usfüehrlichere Bricht folgt wiemers im Lappland gha hend. sLappland isch beidruckend und sehr speziell. Bald chömed es paar Föteli ufd Page, de chamer sich chli vorstelle wies isch, eifach wunderschön. Die verschneit Landschaft, sIcehotel, Hundeschlitte fahre, das isch öpis womer muss erläbt ha, mol öpis ganz anders, aber uf jede Fall sehenswärt. Mer hends natürlich au undernand mit de Lüüt sehr guet gha und so hemer i däne paar Täg sehr viel erläbt und viel Spass gha. Etz simer alli wieder guet heicho und wärded sicher no viel a das Erläbnis zrug dänke...

Mein Geburtstag war super!

Zerscht mol allne ganze viele härzliche Dank für die viele Glückwünsch, mich hed das ganz bsunders gfreut, wil ich ned dehei bi und glich so viel a mi Geburi dänkt hend!

Es isch etz mol chli öpis anders gsi de Geburtstag ned deheime zfiire, sondern ebe halt do in Schwede. Aber es isch natürlich au sehr guet gsi, mer hend eigentlich grad zwoimol gfiired, d.h. am 16. ufe 17. am 12i und de am 17. Januar wo de die richtig Party gsi isch. Mer hend i üsem Korridor Pizza sälber gmacht, öpe insgesamt so 10 riese grossi Familiepizzas. Aber es sind au so viel Lüüt cho und am Schluss isch alles wäg gsi. Es hed natürlich au viel Gratulatione gä, Gschänkli, Chärtli, es hend sich alli sehr Müeh gä und trotzdem dases Mittwoch gsi isch sind alli Lüüt cho wonich guet könne und mer sind de auno alli zäme no fort gange. sGeburtstagschind hed dehalt au chli viel müsse astosse und mit so viele Lüüt isch de au einiges los gsi... Danke no einisch allne vielmol!

Etz gods aber scho ab ufne Trip i ganz hohi Norde, eigentlich es super Geburigschänk. Mer gönd vier Täg is Lappland und ich freumi ganz bsunders, dass wieder einisch meh es paar Kollege vo dehei mich chömid uf Schwede go bsueche und mer wärdid sicher viel erläbe. Reisebricht folgt...

Nachträglich allen ein Frohes Neues Jahr!

Ich weiss, das chund chli spot, aber ich ha doch scho wieder chli öpis müsse mache i däm neue Johr und bi gar nie richtig dezue cho öpis uf dHomepage z’schriebe. Über Silvester simer jo i soner Hütte gsi, ca. 3 Stund mitem Auto Richtung Norde vo Växjö. Ded hemer es grosses Huus für üs gha und mit ingesamt 17 Lüüt isch natürlich einiges los gsi. So hani also e gueti Silvesterparty gha und die folgende füf Täg womer ded gsi sind, sind de eher chli zum usspanne gsi. Mer hend ned viel anders als Spieli gmacht, Film gluegt, chli verusse gsi, einisch go Böötlifahre und einisch simer no en Tag in Götheborg gsi, wil das ded ziemlich ide Nöchi gsi isch.

Noch däne Täg hani mol chli Ziit für mich brucht, wil halt scho die ganz Ziit viel los gsi isch. Noch däre churze Erholig hani aber wieder müsse adUni dänke und etz hani au scho wieder die erscht Präsentation vode Bachelorarbet hinder mier. Etz hemer no einisch es Seminar und de isch das erschte Semester au scho dure. Bis de s’zwoite Semester am 22. Januar wieder afod hani e Wuche Ferie, woni jo no Geburtstag ha und mer no es paar Täg is Lappland gönd, das passed natürlich grad super und ich freumi au mega uf das.

Ide Gallery heds etz no es paar Föteli vom Silvester... Wünsche wie gseid allne Alles Gueti und viel Glück im Neue Johr und ich freumi natürlich immer wieder weni öpis ghöre vo üch! (nomol mini schwedisch Natelnr: 0046/76'233’91’41, dSchwiizer luegi au ab und zue a, aber halt ned so oft...) Bilder gibt es hier!

Wieder in Schweden…

Ich bi wieder guet in Växjö acho. Es isch komisch gsi nur schnell en Abstächer idSchwiiz go mache und noch 10 Täg scho wieder fürnes halbs Johr z’verschwinde. Ich ha aber Ziit würkli gnosse dehei und has ächt guet gha. Ich ha gmerkt, dasses halt glich nur eis dehei gid und ha eigentlich noch so churzer Ziit gar ned grad scho wieder welle go. Naja, etz bini halt wieder do und nochmene Tag Rueh hani au scho wieder einigi Lüüt troffe und das hilft au sich wieder schnell izläbe.
Ich danke allne Lüüt won ich dehei gse ha, es isch schön sone gueti Umgäbig zha. Es ischmer au wieder bewusst worde, dassmi au dehei sehr wohl fühle und alles stimmt. So chani mi au wieder freue wenns g’ordneter Läbe ide Schwiiz zrug chund. Wil aber Ziit jo würkli schnell verbi god, woti die natürlich guet nütze und no einiges erläbe und erreiche i däm nöchschte Semester in Schwede. Ich wirde au im nöchschte Johr wieder ufde Homepage zeige, was ich so mache im hohe Norde. Fürs neue Design vode Homepage isch natürlich de Laubi verantwortlich, grad richtig ufs Neue Johr. Viele Dank Laubi!
Ich wünsche jetz allne en gueti Silvesterparty und bis nöchscht Johr!

Etwas Weihnachtsstimmung aus dem Norden

Au bi üs isch natürlich scho überall Wiehnachtsstimmig. Mer sind darum ane Wiehnachtsmarkt ganz ide nöchi vo Växjö gange, wo angäblich de grössti vo ganz Skandinavie sell si. Naja sisch schöne Wiehnachtsstimmig gsi, aber de Markt sälber isch eigentlich ned so überwältigend gsi. Trotzdem es paar Foteli devo... Bilder gibt es hier!

Das wird etz de letschti Bricht i däm Johr si vo mier, wil ich jo scho gli dehei bi und hoffentlich möglichst viel Lüüt wieder gse! Ziit isch wie sehrwarschindlich au bi üch ide letschte Woche sehr schnell ume gange. Mier hend üsi Bachelorarbet fertig gschriebe, au scho Abschiedsparties gha vo einige Lüüt wo nöchscht Semester nüme wärded do si und halt au schöscht immer öpe öpis gmacht.

Etz freumi aber würkli ufs heicho. Ich ha do viel erläbt, gueti Lüüt könneglehrt, aber s'richtige dehei isch halt glich no öpis anders. Ich hoffe dases mich de au ned zfescht aschiesst wieder zrug zgo, nochdäm ich alli Lüüt vo dehei wieder gse ha. Aber alles chamer halt ned ha. üch alli dehei, Familie, Kollege wirdi sicher au nöchscht Semester vermisse, aber noch allem Abwäge isches sicher die richtig Entscheidig gsi no es Semester in Schwede azhänke. Ziit god jo würkli schnell verbi.

MERRY CHRISTMAS a alli woni ned gse vor Wiehnachte und a alli andere: Ich freumi uf Christmas PartyJ!!

Verlängerung des Auslandsemesters

Wie die meischte vo üch jo scho mitübercho hend, bin ich mier scho länger am überlegge, ob ich no es Semester sel ahänke do in Schwede. Es isch glaub alles chli verwirrend übere cho und darum machis jetz offiziell ufde Homepage:-)
Für die wos interessiert gnaueri Details do:
Es isch eso, dass mich e Professor druf ufmerksam gmacht hed, dass es dChance gäbt do in Schwede en Abschluss z’mache. Das isch aber nur möglich, wemer es ganzes Johr bliebt und es isch au nurno das Semester möglich, wil nochhär alles uf Bologna umgstellt wird und mer de anderhalb Johr muss studiere, um en Abschluss z’erwärbe. I däm Johr bestohd etz aber no dMöglichkeit en Master i zwoi Semester z’mache und das isch au das won ich mier etz scho rächt lang am überlegge bi. Es isch so, dass de Professor mier rächt viel ghulfe hed und entgäge cho isch. Ich ha jo z’Bern gnueg Pünkt füre Bachelor aber Bachelorarbet nonig gschriebe, wil zwenig Ziit gsi isch im Sommer, wil ich scho Endi August uf Schwede gange bi und die Arbet de ganz Sommer dured hät. Ich ha etz aber do chönne noch de erschte zwoi Modul sProgramm wächsle, i eis wo dBachelorarbet enthalte isch. Ich schriebe momentan also grad die Arbet und ha so dMöglichkeit nöchscht Semester de Master z’mache. Nur de Bachelorabschluss elei chamer ned mache, weni etz also zrug giengt hätti kei Bachelorabschluss do, sisch eifach e notwendige Zwüscheschritt füre Master. Weni noch däm Johr wieder zBern studiere chan ich alli Pünkt as Studium in Bern arächne bis uf die Bachelor- und Masterarbet, wilmer die do i Drüergruppe schriebt und das ide Schwiiz ned erlaubt isch.

Sisch alles chli kompliziert, aber uf jede Fall ischs en super Chance für mich mit eim Semester meh en Bachelor und Masterabschluss im Usland chönne z’mache, alles uf Englisch und imene andere Schwärpunkt als ich z’Bern mache wirde.

Das isch also mol die schulisch Siite. Dezue chund, dases mier au schöscht rächt guet gfallt und ich mich würkli guet igläbt ha do. Obwohl einigi Lüüt wärdid nochem erschte Semester heigo, bliebed doch einigi gueti Kollege au länger do.
Uf die ander Siite bini dehalt doch no es paar Mönet länger wäg und das bringt halt au einiges a wiitere Sache, womer muss berücksichtige.
Alles i allem und noch gründlichem Abwäge vo däm allem, han ich mi etz aber entschiede es Semester z’verlängere und somit erscht im nöchschte Sommer wieder zrug z’cho. Ich ha im Allgemeine e gueti Understützig vo vielne Lüüt übercho und darum wirdi das einte Semester sicher auno guet überstoh.

Corine auf grosser Reise

Zur Abwächslig wieder mol es paar Föteli vode Corine vo Amerika. Es muss würkli so si, wiemer sich das vorstellt... Bilder gibt es hier!

Wochenendausflug nach Linköping und Jönköping

Übers letschte Wuchenend hemer en Usflug noch Linköping gmacht. Das isch es schöns Städtli zirka 250km nördlich vo üs und au chli grösser als Växjö. Mer hend chönne mitem Mikka sim Auto go und so simer de au scho noch umständliche 3h acho. Umständlich ischs darum gsi, wil dHeizig ned funktioniert hend! Mer hend also mit Händsche, Kappe und Jagge im Auto gfrore. Zum Glück hemer das noch 100km chönne binere Tankstell behebe und hend mol uf 30°C ufgheizt:-)
De Mikka hed in Linköping es paar Lüüt könnt, wil er bevor er uf Växjö cho isch zerscht e Monet ded gsi isch go schwedisch lere (vo däm isch allerdings ned allzu viel hange blube:-) sorry Mikka!). Für üs isch das aber super gsi, wilmer ded hend zwar chli umbequem am Bode ufere Matte, aber gratis hend chönne übernachte.
Wieni scho mol gschriebe ha, dümer jo do es paar zäme Silväster fiire und es chömed au es paar Lüüt vo Linköping mit. So isches au Sinn und Zwäck vo däm Usflug gsi all die Lüüt wo mitchömid könnezlere. Mer sind de au scho fründlich begrüesst worde und sind grad am Fritig Obe ane Geburtstagsparty iglade worde. Sisch e guete Obe gsi, was de am Samstig es Usschlofe bis am 2 zur Folg gha hed. De hemer de aber endgültig müsse ufstoh, wilmer sind es Ishockeyspiel go luege, erschti schwedischi Liga, super Niveau und super schöns und grosses Stadion! Am Obe hemer de alli zäme koched und hends chli gmüetlicher gno, wilmer jo au öpis vode Stadt hend welle gse!
De Mikka und ich sind de aber schlussendlich am Sonntig glich die einzige gsi, wo de au würkli id Stadt sind und es heds sich würkli glohnt! Linköping isch e schöni Stadt mitmene no schönere Altstädtli. Mer hed sich ded irgendwie gfühlt wie imene Dorf vom Michel von Lönneberga, alles so alti härzigi schwedischi Hüser.
Ufde Rückfahrt simer deno go Jönköping aluege, wil das no en grösseri Stadt isch und grad ufem Wäg gläge isch. Es isch scho richtig Wiehnachtsstimmig gsi und es heds sich au do absolut glohnt auno die Stadt go azluege.
Etz gods aber leider scho wieder voll wieter mit minere Bachelorarbet, Ziit god so schnell, mer hend nurno drü Wuche Ziit und de chumi jo scho, au wenn nur für 10Täg, hei! Bilder gibt es hier!

WELCOME BACK CORINE!!

Ab hüt 26. November 2006 isch Corine wieder vo ihrem Amerika Trip deheime. Sie isch guet acho und ich wünsche dassi sie sich guet erholt und sich wieder guet iläbt!

Verdienti Usziit...

Nochdäm ich au mini zwoit Prüfig bestande ha, han ich mier e Wuche Usziit gönt und ha eifach e Wuche lang nüd gmacht. Ich has richtig gnosse und eifach nüd mache heisst do glich immer öpis los ha, immer mit Lüüt zäme si, usschlofe (wasi eigentlich au schuscht öpe die cha mache do...) und eifach dMöglichkeite ufem Campus nutze. De Start isch de wieder chli harzig verloffe, aber schlussendlich de au wieder glunge...
Ich ha inzwüsche au no mis Programm ade Uni gwächslet, d.h. ich ha zerscht zwoi Modul (wie Fächer) wie ursprünglich planed absolviert und hät etz nomol zwoi wiiteri Modul gha. En Professor hedmer aber dChance gä die zwoi letschte Modul durne Bachelorarbet z'ersetze und somit en Abschluss in Schwede z'mache. Das han ich natürlich agno und ich bi etz grad wilmer sone Arbet do inere 3er Gruppe cha mache mit zwoi andere Kollege vode Uni am Bachelor schriebe. Das gid doch einiges z'due au wilmer doch scho vor Wiehnachte münd fertig si. Im Januar sind de no Seminar, Oppositions, Präsentatione usw.
Übers Wuchenend gömer etz no es paar zäme uf Linköping, das isch en Stadt öpe 3h nördlicher vo üs. De Mikka könnt ded es paar Lüüt womer chönd schlofe und so chömemer wieder mol usem Campus use und gsend en wiiteri Stadt vo Schwede. Reisebricht folgt...

Wieder mol öpis usem Norde

Ich setmi doch au wieder mol mälde vo Schwede! I letschter Ziit ischs chli ruhiger worde do, d.h. es hed nüm so viel Usflüg gä und es isch au nüme alles so Neu womer entdecke muess. Es hed sich ganz langsam fascht so öpis wieni Alltag ergä. Ich hami tatsächlich scho sehr guet igläbt und ich fühlmi scho ganz wohl do mit all däne Lüüt, i mim Korridor, mim Zimmer, dUmgäbig, dUni, es passed alles rächt guet zäme.
sLäbe ufem Campus isch eigentlich zimli anders als das ide Schwiiz. Mer wohnt halt eifach wie imene Dorf, isch aber die ganz Ziit mit vielne Lüüt relativ nöch zäme und durch das machtmer au immer öpis. Ufem Campus hedmer au alles womer brucht zum läbe, es isch jo au sehr gross alles. Vom einte zum andere Endi lauftmer zum Bispiel gueti 20min und es läbed über 3500 Studänte uf däm ganze Gländ. Ade Uni sälber sind ca. 13'000 Studente.
Ide letschte Woche ischs au scho richtig Winter worde. Nochmene sehr schöne, warme und lange Sommer wo bis zirka Mitti Oktober dured hed, heds plötzlich sehr schnell vom eint ufe ander Tag umgstellt und sisch so richtig chalt (-8°C) worde. Scho sehr bald heds de au afo schneie und ich ha gmerkt, dassi würkli im Norde bi. De Schnee isch zwar inzwüsche wieder wäg gange, aber v.a. am Obe isches scho richtig ungmüetlich chalt, mol luege was mich do bis im Dezember oder Januar no so erwartet.
Uf was ich mich scho ganz bsunders freue, isch das ich a Wiehnachte heichume. Usser dAmis und dAsiate bliebed eigentlich nedso viel Lüüt do und ich glaube daesses de doch chli einsam wär do zbliebe. So chumi also am 19. Dezember für 10 Täg hei und wet natürlich alli Lüüt wieder gse, obwohl das de doch chli stressig chönt wärde über die Fäschttäg… mol luege also, ich hoffes eifach mol. Am Silvester isch de aber au scho wieder öpis planed do und wil dUni afangs Januar halt au scho wieder afod, goni (leider) vor de grossi Party wieder uf Schwede zrug.
Ide Gallery heds etz es paar Föteli vo Lüüt woni viel zäme bi und wo s(Party-)Läbe ufem Campus/Korridor chli zeigt. click here

Bricht us San Diego vode Corine!

hey mini liebe

Leider eschs jetz chli lang gange, aber jetz ben au ech online met mine Foteli! So chömed er en chline Iblick öber, was ech die ganz Ziit so astelle! Ech ha sehr aktivi Kollege ond au be mer mues notürlech emmr öpis laufe.... go surfe semr, Jetsky fahre, Skydive oder met Pokere ond Jasse duemr üsi Ziit gniesse! Letscht Weekned beni no z L.A. gsi, aber be sehr entdüscht gsi! De Laguna Beach esch prächtig gsi, aber d Stadt sälber esch ned wörkli sehenswert gsi. San Diego esch vel, vel schöner!! Aber ech froie mech sehr fescht of San Francisco. Das mues wörkli en geniali Stadt si... be sehr gspannt! Aso be üs esch of jede Fall emmr öpis los.....aber das esch jo au s schöne dra!

jetz beni scho 2 ganzi Möned do z San Diego! d Ziit goht för mech noch wie vor wahnsinnig schnell verbi! No 2 Woche gohni ed Schuel ond nöchscht Weekend of San Francisco. Denn hani no 2 Woche Ferie ond eini verbringi z Ohau (Hawaii) ond äs paar Täg weted mr no of Las Vegas (Grand Canyon).
Was natürlech au drzue ghört, esch das mini Kollege woni do gfunde han vorzue hei müend! Au wenns ned emmr eifach esch ade zsäge, esch ganz schön zwösse, dassi hoffentlich alli wedr edä Schwiiz träffe chan!
Mis english hani sechr chli chönne verbesserä, aber ech ha jo au fascht nüd chönne vorhär. Adä Schuel heds öber 50% Schwiizer ond wägedem eschs halt sehr schwierig vel english zredä!
För mech eschs notürlech en geniali ond erläbnissrichi Erfahrig do gsi! Ond au das, woni do alles erläbe, bliibt e mine Erinnerigä.
Scho glii chomi wedr hei, ech froie mech notürlech jetz scho ganz fescht druf, wenni üch wedr gse chan!! Bilder gibt es hier!

Trip to Tallinn

Endlich chum ich dezue über üse Trip noch Tallinn z’brichte. Wieni scho gschriebe ha isch dä Trip vode Uni organisiert worde und das ganze hed sich „Sea Battle“ gnennt. Vo üsere Uni simer ca. 40 Lüüt gsi wo am Samstig 21.10.06 am Morge am 8i mitem Bus Richtig Stockholm ufbroche sind. Noch 6-stündiger Fahrt simer de am Hafe in Stockholm acho und hend es riesigs Krüzfahrtschiff vor üs vorgfunde. Do hend sicher meh als 1000 Lüüt drufe Platz gha. Es sind au no ganz viel anderi Ustuschstudänte vo Unis vo ganz Schwede uf dä Sea Battle cho, insgesamt sinds fascht 450 Ustuschstudänte gsi! Do isch natürlich einiges los gsi und ufem Schiff heds au alles gha um sich z’underhalte: Disco, Karaokebar, Casino, Duty Free Shop, Restaurants usw.
Am Obe am 6i simer losgfahre und sind Richtig Estland ufbroche. Tallinn isch dHauptstadt vo Estland und hed ungefährt 400'000 Iwohner, es lied grad mol 80km südlich übers Meer vo Helsinki. dFahrt isch vo Stockholm südlich a Finnland vorbi fascht waagrecht Richtig Weschte gange und hed fascht 15h dured.
Noch ned grad viel Schlof simer am Sonntig Morge am 10ni vom Schiff gange und sind de go dStadt aluege. dStadt sälber schient eigentlich eher chli, wils halt kei Hochhüser oder moderni Gebäude hed. Sisch aber mega härzig, wils sone russische Touch hed, halt ganz anders als en europäischi Hauptstadt. Es hedmer würkli sehr guet gfalle, irgendwie speziell mol sone Stadt zgse. Es isch au alles rächt billig und nonig so würklich fortschrittlich, aber uf jede Fall Wärt mol sone baltischi Stadt go azluege.
Am Sonntig Obe am 6i isches de wieder Richtig Stockholm gange und noch zwoi interessante, erläbinisrieche und luschtige Täg simer wieder guet in Växjö acho. Bilder gibt es hier!

What's on

Nochere relativ beschäftigte Ziit ischs wieder für kurzi Ziit chli ruhiger worde. Es isch jo au so, dass ich ufde Homepage hauptsächlich beschriebe wenn öpis speziells los isch, de gseds natürlich immer chli so us als immer nur action isch do. Zuegä, mer undernimmt halt scho einiges meh als deheime, nimmt viel meh Möglichkeite wohr und isch au aktiver, wilmer halt die beschränkti Ziit do möglichst wet usnutze und gniesse. Trotzdem bini natürlich wägde Uni do und so mussmer halt immer chli es Gliechgwicht gfinde.
Bis etz hed jo das aber tiptop klapped und darum stod am Wuchenend scho wieder de nöchschti Trip a:-) Es isch das mol e Trip wo vode Uni organisiert isch und es god mitmene Schiff Richtig Estland!

Ich danke übrigens allne für die viele Gästebuechiträg, ich freue mich jedesmol wenn wieder öpis neus gschriebe wird!

Es sind etz auno neue Föteli zum aluege bereit, vom Bsuech vode Jungs: Kopenhagen Bilder gibt es hier! und Växjö Bilder gibt es hier!

Phil, Laubi und Schmidi in Växjö!

Ide letschte Woche isch ziemli viel los gsi, ich ha Uni gha und de Schmidi, Phil und Laubi sind mich go bsueche. Zum Glück hanis chönne irichte, dass i die meischti Ziit mit ihne öpis ha chönne mache. Es hed jo alles scho ganz guet agfange: dJungs sind uf Kopenhagen gfloge und ich bi sie go abhole, wilmer über s’wuchenend no hend welle dStadt aluege. Ich bi vo Växjö und sie vom Flughafe Richtig Kopenhagen gfahre und per Zuefall hemer üs grad im Zug troffe:-)
Das alles isch am letschte Samstag (7.10.06) am morge am 10ni gsi. Mier sind de grad zerscht i das wunderschöne (also eigentlich isches en Abstiegi gsi, aber egal) Hotel wo de Phil scho im vorneherein für üs bueched hed. De simer zwoi Täg lang dur Kopenhagen zoge, hend Sehenswürdigkeite agluegt, hend g’shopped, zwoimol all you can eat gässe, üs ab und zue bimene Bierli im Rosie's (Pub) ufghalte und hends mega guet gha zäme.
Am Sonntig Obe simer de zäme uf Växjö zrug gange. Die drü Kollege hend sich de i mim Zimmer usbreitet und ich ha bimene Kolleg ufde Couch gschlofe. So hend sie au chönne ufem Campus wohne und mer hend vo do us einiges chönne mache. Mer hend de Campus und dStadt agluegt, hend d’Umgäbig vo Växjö besichtiged, sind auno ine Elchpark gange, womer de auno grilliert hend (natürlich Elchwurscht:-) hmm), sind ines Studentepub ufem Campus i Usgang und hend au schöscht so einiges gmacht.
Am Mittwoch Obe hemers üs bimene Abschieds z’Nacht nomol lo guet go lo und wo de d’Jungs am Donnschtig Morge Richtig Flughafe mit es paar Stund Ufenthalt in Malmö, wieder abgfahre sind, isch das chli komisch gsi für mich. Sie hend halt doch es Stückli Heimat mitbrocht (danke übrigens a dere Stell nomol ganz härzlich für d’Schoggi, fürs Mikrowellefondue und fürs Eichhof Bier!) und ich ha gmerkt, dassi halt doch einiges vermisse vo deheime. Mittlerwiele hani aber wieder viel gschlofe, ha ade Uni viel zdue und fühlmi wieder sehr guet ufghobe do.
Alles i allem hend mier vier Kollege es paar super Täg zäme gha, es hed mich würkli sehr gfreut, dass ier mich sind go bsueche, merci Jungs!
Föteli folgid bald.

Kurzes Update

Ich ha do no es paar Föteli gfunde wo s’Schloss ufem Campus zeigt. Mer hend das chöne go aluege und hend ded e chline apéro gha, würkli sehr schön. De bini mit mim „buddy“ einisch go Golf spiele, was natürlich au super gsi isch. Gester hemer auno en Corridor Crawl gha, d.h. all Lüüt vomene Korridor triffed sich im Wohnzimmer und gönd nochhär vo Zimmer zu Zimmer. Jede dued de öpis vo sim Land, meischtens e Drink oder so öpis, offeriere. Mier hend zerscht alli zäme gässe und hend de nochhär de crowl gha. Das macht fascht jede Korridor einisch und sisch würkli mega luschtig. Mer hend 12 Zimmer ufem Korridor und acht verschiedeni Natione (devo 5 Schwede). Wiemer de aber ufde Fotene gsed sind de schlussendlich glich no viel me Lüüt a üse crawl cho. Ich ha übrigens Toblerone abote und Cheli gmacht:-) click here

I passed my exam!!

Mer hend hüt üsi Prüfig zrugbecho und ich ha bestande! Bi natürlich mega glücklich, wil nomol 5h Prüfig, e Text läse und sächs Siite schriebe hätti würkli kä Luscht me gha. Hüt hemer no müsse es Paper abgä und e Präsentation drüber mache. Morn fod etz aber scho wieder s'neue Modul a und dUni god wiiter... Naja immer chamer halt ned nur Spass ha und ich bi jo eigentlich hauptsächlich wägem studiere do:-)!

Trip nach Göteborg

Am Mittwoch Morge simer mitem Kolleg sim Auto ufbroche noch Göteborg. Noch zirka 2.5h Fahrt simer bi Rägewätter acho und mer hend doch welle uf dä Trip solangs no schön isch! Zum Glück heds de aber gli ufghört und sisch de glich no me oder weniger die ganz Ziit schön gsi. Eigentlich hemer jo mit zwoi Franzose welle go, wie aber Franzose so sind (die hend z.B. en zuesätzlichi Viertelstund bim abmache, d.h. sisch völlig ok wemer am viertel ab 2 chund und mer am 2 abmacht hed…) hend sie üs churzfristig abgseid, wil sie irgendwie gmerkt hend, dass sie no es 10-siitigs Paper am Fritig müend abgä… naja de bini halt mitem Österricher elei gange.
Mer hend de ded chönne binere Kollegin vo ihm übernachte und sie hed üs au die ganz Stadt zeigt. Göteborg isch die zwoitgrösst Stadt vo Schwede und lied direkt am Meer. De ganzi Trip isch würkli mega cool gsi und mer sind de au e Tag länger blube als mer eigentlich planed hend und sind de erscht gester Fritig Obe ide Nacht heicho.
Nochere Elchpark Besichtigung und Usgang am Mittwoch hemer am Donnstig dStadt agluegt (Stadt, grosse Hafe, s'gröschte Shoppingcenter vo Europa, Botanisch Garte, Ussichtsturm usw.) und sind de au am Fritig mitmene Schiff ufne Inselgruppe grad vorde Stadt gfahre. Ded gids einigi chlini Dörfli, kei Autos und sisch idyllisch wie sälte amene Ort zum läbe.
Am Fritig Obe simer de wie dSchwede das so möched is After Work (obwohl mier jo eigentlich ned so hert gschaffed hend…). Jedefalls chamer ded i einige Restaurants gratis vom Buffet ässe und muss nur es Getränk kaufe. sZiel isch dass dLüüt sich am Fritig nochem schaffe nomol triffid, zäme diskutierid und scho früener i Usgang gönd. Nochhär simer de ziemli gschafft ufde typische Strosse do, wos fascht kei Kurve gid, links und rächts nur Wald isch unds viellicht ab und zue es Seeli gid, wieder zruggfahre.
Vielen Dank Steffi, es hat mir sehr gut gefallen! Bilder gibt es hier!

Update!

Es isch jo scho chli bemängled worde, dass ich mich zwenig mälde uf minere Homepage und mer gar ned so richtig weiss, was do alles so lauft… hmm, das hed en eifache Grund: I’m always on the road:-) Ich bemüeh mich aber natürlich chli öfter z’schriebe.
Ide letschte paar Täg hani sowieso müsse chli zrugstecke, wil ich hüt (Montag 25.9.) scho die erscht Prüfig gha ha! Mer hed do immer nur eis Fach uf einisch, öpe 3-4 Woche, womer Vorläsige, Seminar, Gruppearbete hed, Vorträg mache muess oder au mol es Paper schriebe muess. De isch Prüfig und s’nöchschte Modul started. Isch rächt anders als ide Schwiiz, aber das machts jo interessant und näbebi wärded au mini Englishkenntniss verbessered:-) Natürlich redmer au jede Tag Englisch mit de Internationals, aber au mit Schwede, wo sowieso alli rächt guet englisch chönd.
Etz nochde Prüfig hani wieder e Woche wonis chli lockerer ha und nütze das grad us fürne Trip noch Göthenburg. Solang sWätter no schön isch mussi das natürlich usnütze und so chumi au chli ume, weni scho mol in Schwede bi:-)

Erste Fotos

Wie scho lang erwartet chömed etz endlich die erschte Fotene uf mini page. Es isch einiges los und ich bi eigentlich immer underwegs, natürlich ghört au s’studiere do dezue! Aber au schöscht spieli Fuessball, go ab und zue is Fitness, gniesse no die schöne und warme Täg do (wer weiss wie lang das no so wird si…), choche mit Lüüt zNacht, wäsche (zuegä ned elei…) und bi natürlich au ab und zue im Usgang. Bilder gibt es hier! Welcome Dinner Bilder gibt es hier!

Erste Woche in Växjö (say „weggchö“)

Hallo a alli ide schöne warme Schwiiz wieni ghört ha! (mier hend öpe 20°C…) Endlich chumi dezue mini erschte Idrück zbeschriebe. Ich bi mol zerscht guet acho und bi ines Zimmer usserhalb vom Campus iquartiert worde. Ded hedmer eigentlich so einiges ned passed und wil ich au scho Lüüt vom Campus könneglert ha, hami de müsse wehre und duresetze, dass ich mich jetz defür richtig wohl fühle und au ufem Campus wohne. Ich ha etz (noch 2h putze!) es schöns und gmüetlichs Zimmer mit WC und Duschi. Uf mim Korridor sind no 12 anderi Studente (Schwede, Amerikaner, Portugiese, Engländer, Franzose) und mer teiled üs e Kuchi und es Wohnzimmer.

sCampus läbe isch sehr cool. Mer hed halt alles wasmer zum läbe brucht a eim Platz, Ichaufsmöglichkeite, Sport, Uni, Pubs (wo do eher wie Discos sind) usw. Ich ha nur grad zwoi Minute zude Uni und mitem Velo 10min idStadt. Växjö hed ca. 80'000 Iwohner und isches mega schöns Städtli. sLäbe findet aber scho hauptsächlich ufem Campus statt, mer chönt eigentlich jede Tag irgendwo ufmene Korridor ufne Pre-Party, de i Usgang (under de Wuche nur bis am 1, was eigentlich gar ned schlächt isch) und de wieder ufne Afterparty go. dUni hed aber natürlich au scho agfange und mer münd zimli viel läse und Gruppearbete mache, es gilt halt irgendwie en Balance zgfinde.

Ich ha übrigens en neui schwedischi Natelnummere (0046/76’233’91’41), wils halt viel günstiger isch zum telefoniere underenand. Wili ned zwoi Natels ha, luegi nur ab und zu i mini eigentlich Nummere ine, schöscht freu ich mich aber natürlich au über e-mails (jacomet@gmx.net).
So, ich hoffe ier hend au alli e gueti Ziit und ich mälde mich wieder.

Abschiedsfäschtli

Und scho isch au üses Abschiedsfäschtli über Bühni und scho gli bini underwägs i chalti Norde. Sisch schön dass so viel Lüüt cho sind, hedmi würklich gfreut! Ich danke au allne wo dezue bitreid hend, dasses en gemütliche und luschtige Obe gsi isch. Viele Dank also a alli wo Salat und Dessert mitgno hend, Musikalag, Biemer, Hüttlimietesponsore usw. Ide Gallery heds au scho die erschte Bilder posted, wiiteri folged hoffentlich gli vo Schwede! Wünsche allne e schöni Ziit, möcheds guet und bis bald wieder, Ziit god jo amigs (viel z)schnell verbi. Bilder gibt es hier!

Es gahd los!

Bald fod mis Uslandsemester in Schwede a. Ich flüge am 30. August 2006 ab und wirde vier bis füf Mönet in Växjö verbringe und ded ade Uni eis Semester studiere. Natürlich weti au nochli me vo Schwede gse und wirde uf dere Homepage, gsponsored und understützt vom Laubi (merci viel mol!!) me oder weniger regelmässig beschriebe, wies so lauft in Schwede und natürlich au es paar Bildli poste.

Uslandsemester in Växjö

Abschlusstrip nach Stockholm und Midsummer in Lysekil